Viloyat huquqni muhofaza qiluvchi organlari rahbariyati tomonidan Namangan viloyatidagi bayram tadbirlari o‘tkaziladigan joylarda xavfsizlik choralari o‘rganildi
O‘zbekiston Respublikasi davlat mustaqilligining o‘ttiz to‘rt yillik bayramini viloyatimizning barcha shahar va tuman markazlarida munosib kutib olish va aholi xavfsizligini taʼminlash huquqni muhofaza qiluvchi organlar zimmasiga asosiy vazifa etib belgilandi.
Shu munosabat bilan bugun viloyat IIB, Milliy gvardiya boshqarmasi va Favqulodda vaziyatlar boshqarmasi boshliqlari To‘raqo‘rg‘on, Chust, Pop, Mingbuloq va Namangan tumanlari markazlaridagi bayram tadbirlari o‘tkaziladigan o‘yingoh hamda amfiteatrlarni ko‘zdan kechirdi. Unda tashrif buyuruvchilar xavfsizligi va yaratilgan shart-sharoitlar o‘rganildi.
Shuningdek, xavfsizlikni taʼminlash uchun biriktirilgan xodimlar va mutasaddi tashkilot vakillariga bayram tadbirlari davomida hushyorlikni oshirish, belgilangan tartib-qoidalarga qatʼiy amal qilish hamda xizmatni yuqori masʼuliyat bilan o‘tash bo‘yicha tegishli topshiriqlar berildi.
Bu kabi o‘rganishlar viloyatning qolgan hudularida ham davom etmoqda.
Namangan viloyati IIB Axborot xizmati
