Вилоят ҳуқуқни муҳофаза қилувчи органлари раҳбарияти томонидан Наманган вилоятидаги байрам тадбирлари ўтказиладиган жойларда хавфсизлик чоралари ўрганилди
Ўзбекистон Республикаси давлат мустақиллигининг ўттиз тўрт йиллик байрамини вилоятимизнинг барча шаҳар ва туман марказларида муносиб кутиб олиш ва аҳоли хавфсизлигини таъминлаш ҳуқуқни муҳофаза қилувчи органлар зиммасига асосий вазифа этиб белгиланди.
Шу муносабат билан бугун вилоят ИИБ, Миллий гвардия бошқармаси ва Фавқулодда вазиятлар бошқармаси бошлиқлари Тўрақўрғон, Чуст, Поп, Мингбулоқ ва Наманган туманлари марказларидаги байрам тадбирлари ўтказиладиган ўйингоҳ ҳамда амфитеатрларни кўздан кечирди. Унда ташриф буюрувчилар хавфсизлиги ва яратилган шарт-шароитлар ўрганилди.
Шунингдек, хавфсизликни таъминлаш учун бириктирилган ходимлар ва мутасадди ташкилот вакилларига байрам тадбирлари давомида ҳушёрликни ошириш, белгиланган тартиб-қоидаларга қатъий амал қилиш ҳамда хизматни юқори масъулият билан ўташ бўйича тегишли топшириқлар берилди.
Бу каби ўрганишлар вилоятнинг қолган ҳудуларида ҳам давом этмоқда.
Наманган вилояти ИИБ Ахборот хизмати
