Namangan viloyati Ichki ishlar boshqarmasi rahbariyati tomonidan hududlarda jinoyatchilikni oldini olish, jamoat xavfsizligini taʼminlash, yo‘l harakati infratuzilmasini yaxshilash va ichki ishlar organlari faoliyatini tanqidiy tahlil qilish bo‘yicha olib borilayotgan tizimli o‘rganishlar davom etmoqda.

Bugun navbatdagi o‘rganish ishlari Uychi tumanida o‘tkazilib, Boshqarma rahbariyati boshchiligidagi ishchi guruh tumandagi ichki ishlar bo‘limi faoliyati bilan yaqindan tanishdi. Xususan, tuman hokimi ishtirokida “qizil” toifadagi “Bog‘” va “Beruniy” mahallalarida jinoyatchilikni oldini olish yo‘nalishida amalga oshirilgan ishlar o‘rganilib, mahalla yettiligi tomonidan olib borilgan chora-tadbirlar atroflicha muhokama qilindi.

O‘rganishlar davomida mazkur mahallalarda jinoyatchilikka qarshi kurashish borasida yetarli darajadagi tizimli ishlar olib borilmaganligi natijasida ushbu hududlar uzoq vaqt davomida “qizil” toifada bo‘lib kelayotganligi keskin tanqid qilindi. Mahalladagi profilaktik ishlarni kuchaytirish, jinoyatchilikka olib keluvchi omillarni erta aniqlab, ularni bartaraf etish bo‘yicha aniq vazifalar belgilab berildi.

Shuningdek, ichki ishlar bo‘limining maʼmuriy binosi holati, shart-sharoitlari, xodimlar faoliyati va o‘tgan davrdagi xizmat natijalari ham tanqidiy ruhda tahlil qilindi. Xizmat intizomi va jinoyatlarning barvaqt oldini olishdagi faoliyat samaradorligi masalalariga alohida to‘xtalib, aniqlangan kamchiliklar yuzasidan masʼul rahbar va xodimlar qatʼiy ogohlantirildi.

Ishchi guruh tomonidan Yo‘l harakati xavfsizligi boshqarmasi masʼullari bilan birgalikda “Oqtosh” mahallasidan o‘tuvchi avtomobil yo‘lida mavjud yo‘l infratuzilmasi holatini ham o‘rganildi. Ushbu hududda transport harakati zichligi, tirbandliklar, piyodalar xavfsizligi masalalari atroflicha ko‘rib chiqilib, mavjud muammolarni bartaraf etish bo‘yicha taqdim etilgan loyiha taklifi ko‘rib chiqildi. Yo‘l harakati xavfsizligini taʼminlash, tirbandliklarni oldini olish, transport oqimini samarali tashkil etish yuzasidan masʼul rahbarlarga zarur ko‘rsatmalar berildi.

Ushbu o‘rganish natijalari asosida tegishli xizmat rahbarlari va hududiy bo‘limlarga aniqlangan kamchiliklarni bartaraf etish, aholi bilan hamkorlikni kuchaytirish hamda mahallalarda xavfsiz muhitni taʼminlash bo‘yicha amaliy chora-tadbirlarni belgilab olish bo‘yicha aniq topshiriqlar yuklatildi.

Namangan viloyati IIB Axborot xizmati