Namangan viloyati ichki ishlar organlarida xizmat qilayotgan ayol xodimalar bilan jismoniy-jangovar o‘quv mashg‘ulotlari o‘tkazildi
Namangan viloyati IIB Maʼnaviy-maʼrifiy ishlar va kadrlar bilan taʼminlash xizmati tomonidan tizimda xizmat qilayotgan ayol xodimalarni formali kiyim-bosh kiyish tartibiga rioya qilinishi va jismoniy-jangovar tayyorgarligini oshirish yuzasidan saf ko‘rigi hamda o‘quv mashg‘ulotlari tashkil etildi.
Dastlab xodimalarga Jismoniy va jangovar tayyorgarlik bo‘limi xodimlari tomonidan saf ko‘rigi hamda saf tayyorgarligi mashg‘ulotlari o‘tkazildi. Jamoat tartibini saqlash boshqarmasi xodimlari tomonidan esa maxsus vositalarning turlari, tasnifi, shuningdek, xizmatda qo‘llash usullari yuzasidan tushunchalar berildi.
Shundan so‘ng, tezkor vazifalarni bajaruvchi safarbarlik otryadi xodimlari tomonidan o‘qotar qurollarni to‘liqsiz qismlarga ajratish va yig‘ish tartiblari tushuntirilib, xodimlarning bu boradagi amaliy tajribalari sinovdan o‘tkazildi.
Tadbir yakunida, xodimalar simulyatsion elektron tirida o‘q otish mashqlarini bajarishib, o‘zlarining amaliy tajriba va ko‘nikmalarini oshirishdi.
Namangan viloyati IIB Axborot xizmati
