25 Avgust 2025 yil 56

Kosonsoy tuman prokurorining tuman aholisiga murojaati

Aziz  yurtdoshlar,  tumanimiz  mehmonlari!

Barchaga maʼlumki, Davlatimiz Rahbari tomonidan aholi osoyishtaligi va xavfsiz hayotini taʼminlashga alohida eʼtibor qaratilib, mahallalarda xavfsiz muhitni yaratish va huquqbuzarliklarning oldini olish borasida keng qamrovli amaliy chora - tadbirlar amalga oshirilmoqda.

Barcha soxalarda ijobiy o‘zgarishlar bo‘lib, isloxotlar amalga oshirilmoqda.

Tinchlik va osoyishtalikni taʼminlash, buning uchun jinoyatchilikka qarshi kurashish tizimini tubdan yaxshilashni davlat siyosatining eng ustuvor yo‘nalishlaridan biriga aylandi.

Zero, bu islohotlarning samarasi barcha sohalarda qonun talablariga so‘zsiz rioya etishga, jinoyatchilik kabi illatning oldini olishga bevosita bog‘liqdir.

Aziz Kosonsoy tuman ahli!

Tumanimizda tinchlik va osoyishtalikni taʼminlash borasida keng qamrovli ishlar amalga oshirilmoqda.

Jinoyatlar uchun jazo muqarrarligini taʼminlash vazifasi qanchalik muhim bo‘lsa, ularni keltirib chiqarayotgan sabab va omillarini bartaraf qilish borasida choralar ko‘rilayapti.

Prezidentning 03.01.2025-yildagi PQ – 1 - sonli Qarori ijrosini taʼminlash bo‘yicha viloyatda bir qator samarali ishlar  amalga  oshirilmoqda.

Jinoyatlarning sabablarini “mahallabay” va “sohabay” muhokama qilish tartibi, mahallalarni kriminogen darajasida toifalash tizimi, “mahalla yettiligi” instituti, “ijtimoiy profilaktika” tamoyili asosida huquqbuzarliklarning samarali profilaktikasini amalga oshirish orqali aholida xavfsizlik hissini shakllantirish borasidagi ishlar amalga oshirilmoqda.

Tumandagi jami 56 ta mahallaning kriminogen vaziyati og‘ir 6 tasiga masʼul rahbarlar nomma-nom biriktirilgan.

Barcha tuman va mahallalarning choraklik, shuningdek 3-chorak uchun manzilli chora-tadbirlar “yo‘l xaritalari” ishlab chiqildi.

“Yo‘l xaritasi” ijrosi bo‘yicha aholi gavjum joylarga 170 ta, ko‘p qavatli uylarning hovlisiga 360 daraja aylanuvchi 3 ta, mahallalarning asosiy kirish-chiqish joylariga 40 ta, bozor va savdo markazlariga yuzni va avtomobil raqamini tanib oluvchi 6 ta kameralar, ko‘p qavatli uylarning eshiklariga 4 dan ortiq damofonlar, uylarning kirish yo‘laklariga 3 dan ortiq tashvish tugmalari o‘rnatildi, 18 ta savdo muassasalari qo‘riqlovga olindi.

Eng muhumi, namunaviy xavfsiz ko‘cha va yo‘laklarning tashkil etilishi kriminogen vaziyat barqarorligini taʼminlashda o‘zining o‘zining ijobiy natijasini ko‘rsatmoqda.

Yo‘l-xaritaning mazkur bandi to‘liq bajarilib, tuman hududida 10 dan ortiq xavfsiz ko‘cha va 30 dan ortiq xafsiz yo‘laklar tashkil etilib, aholi va keng jamoatchilikning xafsizligini taʼminlanga xozirda xizmat qilmoqda.

Qarorga asosan hududlarda kriminogen vaziyat hamda jinoyatchilikni oldini olish bo‘yicha kunlik so‘rov va o‘rganishlarni yo‘lga qo‘ydik.

Joriy yilning 7 oyida tumanda 331 ta jinoyat ro‘yxatga olinib, shundan ulardan 74 tasi (2024 y. 7 oy – 89 ta) oldini olish mumkin bo‘lgan jinoyatlarni tashkil etgan.

Oldini olish mumkin bo‘lgan jinoyatlarning 12,9 foizini o‘g‘rilik, 3,8 foizini firibgarlik, 2,5 foizini bezorilik, 1,7 foizini oilaviy zo‘ravonlik va 1,29 foizini tan jarohati yetkazish kabi jinoyatlarini tashkil etadi.

O‘tgan 24 kun davomida esa, tumanda umumiy 41 ta jinoyatlar sodir etilgan bo‘lsa, ularning 15 tasi oldini olish mumkin bo‘lgan jinoyatlar bo‘lgan.

Mazkur jinoyatlar tarkibini asosan tan jarohati yetkazish hamda o‘g‘rilik jinoyatlar tashkil etib kelmoqda.

Bu kabi jinoiy harakatlarni oldini olish borasida tuman huquqni muhofaza qiluvchi organlar bilan hamkorlikda ijtimoiy profilaktika obyektlari bilan yakka tartibdagi uchrashuvlar o‘tkazilib, rasmiy ogohlantirishlar berib kelinmoqda.

Shuningdek, “Yo‘l xaritasi” ijrosi yuzasidan hududlarni xavfsizligini taʼminlash maqsadida kuzatuv kameralarini o‘rnatilishi va tungi reyd tadbirlarini o‘tkazilishi jadallashtirilib, fuqarolarga mol-mulklarini qarovsiz holda qoldirmasliklari haqida tushuntirish ishlari olib borilmoqda.

Albatta, mahalla hududida sodir etilayotgan jinoyat har birimizni tashvishga solishi va uning oldini olishga qaratilgan profilaktik tadbirlarni har bir mutasaddi idoralar bilan birgalikda samarali tashkil qilishimiz asosiy vazifalardan bo‘lib kelmoqda.

Qayd etilayotgan davrda oldini olish mumkin bo‘lgan jinoyatlarning 45 tasi mahalla  hududida  sodir  etildi.

Mahallalarda sodir etilgan oldini olish mumkin bo‘lgan jinoyatlar sabablari tahlil qilinib, 34 ta jinoyatlar bo‘yicha 41 ta tegishli prokuror taʼsir choralari  qo‘llanildi va faoliyati davomida kamchiliklarga yo‘l qo‘yib kelgan 20 dan ortiq masʼul xodimlar intizomiy javobgarlikka tortildi.

Bu boradagi amaliy tadbirlarimiz davom etib, kelgusida mahalla hududida sodir etilishi mumkin bo‘lgan jinoyatlarning oldini olish, jinoyatlarning kelib chiqish sabablari va omillarini aniqlash hamda ularni o‘z vaftida bartaraf etish bo‘yicha samarali choralar ko‘rib boriladi.

Hurmatli Kosonsoyliklar!

Jinoyatchilikni oldini olish hamda korrupsiyaviy holatlarni bartaraf etish bo‘yicha kuchaytirilgan ish tartibini joriy etdik.

Bu borada viloyat prokurori farmoyishi qabul qilib, barcha tezkor xodimlar har bir mahallalarga nomma-nom biriktirildi.

Sohaga doir targ‘ibot ishlari bo‘yicha uslubiy qo‘llanmalar ishlab chiqilib, bu boradagi profilaktik tadbirlarimizni hamon davom ettirmoqdamiz.

Eʼtiboringizni huquqbuzarlik va jinoyatlarning oldini olish bo‘yicha dastlabki bajarilgan ishlar va tahlillarning natijalariga qaratsam.

Birinchidan, jinoyatchilikka qarshi kurashish faoliyati samaradorligini oshirishda sohaviy nazorat kuchaytirildi.

Joriy yilning 7 oyida 59 ta o‘rganishlar o‘tkazilib, 400 dan ortiq shaxslarning buzilgan huquqlari tiklandi. Bu ishlar muntazam davom etadi.

Ikkinchidan, huquqni muhofaza qiluvchi organlar ham, aholi ham ko‘proq eʼtibor berishi lozim bo‘lgan hamkorlik kuchaytirilishi kerak bo‘lgan bir nechta jinoiy omillarga diqqat qaratmoqchiman.

Shiddat bilan rivojlanayotgan yurtimizda insonlar ko‘proq pul topish bilan birga, noqonuniy boylik orttirishning yangi yo‘llarini ham o‘ylab topmoqdalar.

Keyingi vaqtlarda firibgarlik va o‘g‘rilik jinoyati oshayotgani ham bunga yaqqol misol bo‘ladi.

Firibgarlik va o‘g‘rilik jinoyatlari aksariyat hollarda axborot texnologiyalari va internet ijtimoiy tarmoqlari orqali sodir etilayotganligi tashvishli holdir.

So‘nggi vaqtlarda O‘zbekiston huquq idoralari ilgari duch kelmagan kiber makondagi jinoyatlar salmog‘i ortishi anchagina tashkiliy choralar ko‘rishni taqozo etdi.

Maʼlumot uchun, tumandagi jinoyatlarning 64 foizini axborot texnologiyalari sohasidagi jinoyatlarni tashkil etsa, o‘tgan 24 kun davomida 21 ta bu turdagi jinoyatlar sodir etildi.

Kiber makonda sodir etilgan jinoyatlarning 38,7 foizi firibgarlik hamda 59,1 foizi o‘g‘rilikni tashkil qilgan.

So‘nggi yillarda bu toifadagi jinoyatlar, bir necha baravarga ko‘paydi.

Ilgari bunday jinoyatlarga qarshi ishlaydigan tizim bo‘lmagan. Shu sababli, aholimizdan firibgarlik qurboni bo‘lmaslik uchun, internet ijtimoiy tarmoqlari orqali kelayotgan turli xil feyk xabarlardan ehtiyot bo‘lishlarini hamda bank kartalari va hisob raqamlari to‘g‘risidagi   maʼlumotlarni sir saqlashni so‘rab qolamiz.

Aziz tumandoshlar!

Juda ko‘p masalalarda ish uslublarimiz o‘zgarishi zarur, buning ustida ishlayapmiz.

Prezidentimiz talab qilayotgan, jinoyatlarning oqibatlari emas, ularning sabablarini, huquqbuzaliklarga imkon beruvchi shart-sharoitlarni bartaraf qilishni ustuvor vazifa deb xalq bilan birgalikda harakat qilishimiz kerak.

Buning uchun, har bir mahalla, xonadongacha tushib, huquqbuzarlik omillarini aniqlashga eʼtiborimizni kuchaytiramiz, jinoyat sodir etgan va bunga moyilligi bor fuqarolar bilan uchrashuvlar o‘tkazib, “fuqarobay” ish tizimini joriy qilamiz.

Huquqbuzarlik va jinoyatga sabab bo‘layotgan oilaviy, ijtimoiy, moddiy va psixologik muammolarni hal qilishga, har bir fuqaroda “jinoyatchilikka qarshi immunitet”ni bolalikdan shakllantirishga alohida eʼtibor qaratamiz.

Aziz hamyurtlar!

Jinoyatlarga qarshi kurashda prokuratura organlari, ko‘mak va hamkorlikda jinoyatlarning har qanday ko‘rinishiga chek qo‘yishga kafolat beradi.

Shunday ekan aholi va keng jamoatchilikni jinoyatlarni oldini olishga hamda ularni bartaraf etishga faol hamkorlikka chaqiramiz.

Shuni yana bir bor alohida qayd etamanki, jinoyatning har qanday ko‘rinishiga tezkor ravishda munosabat bildirishga, jinoyatga qo‘l urganlarga nisbatan jazoning muqarrar taʼminlanishiga shaxsan kafolat beraman.

Eʼtiboringiz uchun rahmat!

Kosonsoy tuman prokurori K.Askarov

Axborot xizmati

Text to speech