Viloyatimiz hududi bo‘ylab mahallalarda xavfsiz muhitni yaratish, jinoyatchilikka qarshi kurashish va huquqbuzarliklarning barvaqt oldini olish bo‘yicha muntazam ravishda manzilli chora-tadbirlar amalga oshirilmoqda. Biroq, ayrim mahalla yettiliklari hamda masʼul xodimlar tomonidan yetarli ishlar tashkil etilmaganligi oqibatida oila-turmush doirasida og‘ir turdagi jinoyatlar sodir etilmoqda.

Jumladan, bugun boshqarma rahbariyati tomonidan Davlatobod tumanining “Navbahor”, “Ijodkor”, To‘raqo‘rg‘on tumanining “Guliston” mahallalari hududida sodir etilgan og‘ir turdagi jinoyatlarning kelib chiqish sabablarini o‘rganish va ularni mahalla faollari hamda jamoatchilik vakillari ishtirokida chuqur tahlil qilish maqsadida Davlatobod tumanidagi “To‘quvchi”, “Orzu” va “O‘rta Rovuston” mahallalarida muhokama yig‘ilishi o‘tkazildi.

Muhokama davomida mazkur jinoyatlarning sodir etilishiga sababchi bo‘lgan va sustkashlikka yo‘l qo‘ygan masʼullarning faoliyati keskin tanqid qilinib, qatʼiy ogohlantirildi. Shuningdek, kelgusida bunday og‘ir oqibatli jinoyatlarning oldini olishda aholi muammolarini xonadonma-xonadon o‘rganish, ularga samarali yechim topish hamda PQ-1-son qarori ijrosini to‘liq taʼminlash yuzasidan aniq topshiriqlar berildi.

Namangan viloyati IIB Axborot xizmati