Вилоятимиз ҳудуди бўйлаб маҳаллаларда хавфсиз муҳитни яратиш, жиноятчиликка қарши курашиш ва ҳуқуқбузарликларнинг барвақт олдини олиш бўйича мунтазам равишда манзилли чора-тадбирлар амалга оширилмоқда. Бироқ, айрим маҳалла еттиликлари ҳамда масъул ходимлар томонидан етарли ишлар ташкил этилмаганлиги оқибатида оила-турмуш доирасида оғир турдаги жиноятлар содир этилмоқда.

Жумладан, бугун бошқарма раҳбарияти томонидан Давлатобод туманининг «Навбаҳор», «Ижодкор», Тўрақўрғон туманининг «Гулистон» маҳаллалари ҳудудида содир этилган оғир турдаги жиноятларнинг келиб чиқиш сабабларини ўрганиш ва уларни маҳалла фаоллари ҳамда жамоатчилик вакиллари иштирокида чуқур таҳлил қилиш мақсадида Давлатобод туманидаги «Тўқувчи», «Орзу» ва “Ўрта Ровустон” маҳаллаларида муҳокама йиғилиши ўтказилди.

Муҳокама давомида мазкур жиноятларнинг содир этилишига сабабчи бўлган ва сусткашликка йўл қўйган масъулларнинг фаолияти кескин танқид қилиниб, қатъий огоҳлантирилди. Шунингдек, келгусида бундай оғир оқибатли жиноятларнинг олдини олишда аҳоли муаммоларини хонадонма-хонадон ўрганиш, уларга самарали ечим топиш ҳамда ПҚ-1-сон қарори ижросини тўлиқ таъминлаш юзасидан аниқ топшириқлар берилди.

Наманган вилояти ИИБ Ахборот хизмати