Ўзбекистон Республикаси давлат мустақиллигининг ўттиз тўрт йиллик байрамини вилоятимизнинг барча шаҳар ва туман марказларида муносиб кутиб олиш, “Ватан учун, миллат учун, халқ учун!” шиорига асосланган ташкилий ҳамда маънавий-маърифий тадбирларни ўтказиш, аҳолининг хавфсизлигини таъминлаш ҳуқуқни муҳофаза қилувчи органлар зиммасига асосий вазифа этиб белгиланди.

Шу муносабат билан бугун Ички ишлар вазирининг биринчи ўринбосари, вилоят ИИБ бошлиғи, Миллий гвардия бошқармаси раҳбари, Давлатобод туман ҳокими ҳамда бошқа масъул раҳбарлар иштирокида Давлатобод туманидаги “Янги Ўзбекистон боғи” амфитеатри кўздан кечирилди. Унда ташриф буюрувчилар хавфсизлиги ва яратилган шарт-шароитлар ўрганилди.

Шунингдек, хавфсизликни таъминлаш учун бириктирилган ходимлар ва мутасадди ташкилот вакилларига байрам тадбирлари давомида ҳушёрликни ошириш, белгиланган тартиб-қоидаларга қатъий амал қилиш ҳамда хизматни юқори масъулият билан ўташ бўйича тегишли топшириқлар берилди.

Наманган вилояти ИИБ Ахборот хизмати