Dastlab “O‘zbekiston – 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi ijrosi yuzasidan kelib chiqadigan vazifalarni sudyalar faoliyatiga tatbiq etish bo‘yicha ishlab chiqilgan alohida dastur bo‘yicha so‘z yuritildi. Sudyalar ushbu dasturda belgilangan muhim vazifalarga to‘xtalib, ularni amalga oshirishga doir chora-tadbirlar haqida maʼlumot berdilar.

Shundan so‘ng, Namangan viloyati sudi raisi, sud faxriylari hamda akdemik litsey o‘quvchilari ishtirokida “Sudya va yoshlar” uchrashuvi bo‘lib o‘tdi.

Ochiq muloqot, samimiy suhbat tarzida kechgan uchrashuvda viloyat sudi raisi Alisher Usmanov, sud faxriylari o‘quvchilik va talabalik yillarini esga olib, Yangi O‘zbekiston yoshlariga yaratib berilayotgan bugungi sharoitlarni eʼtirof etdilar. Sudyalik kasbining adolatni, inson huquq va manfaatlarini taʼminlashdagi ahamiyati, kelgusida mazkur tizimda faoliyat olib borishni istagan yoshlar mustahkam bilim olishga intilishi, o‘z ustida ishlashi zarurligini taʼkidladilar.

Ichki ishlar vazirligining Namangan akademik litseyida taʼlim olayotgan o‘quvchilar orasida sud-huquq sohasiga qiziquvchilar ko‘pchilikni tashkil etadi. Ayni jihatdan, yuzma-yuz muloqotda yigit-qizlar o‘zlarini qiziqtirgan savollar bilan mehmonlarga murojaat qildilar. Ularning savollariga hayotiy misollar, amaliyotda uchraydigan voqea-xodisalar bilan javob qaytarilgani bo‘lajak huquqshunoslarni sud tizimiga, sudyalikka bo‘lgan qiziqishini oshirdi.

Jonli muloqotlarga boy o‘tgan uchrashuv yakunida viloyat sudi raisi tomonidan taʼlim muassasasiga Namangan viloyati sudlarining “Moziyga bir nazar” nomli kitob-albomi sovg‘a qilindi.

Uchrashuvdan so‘ng mehmonlar akademik litseyda tashkil etilgan “Jasorat” muzeyida bo‘ldilar. Ekskursiya davomida sudya va sud faxriylari ichki ishlar organlarining shonli tarixini aks ettiruvchi manbalar, muzey fondidagi nodir eksponatlar, tarixiy hujjatlar hamda milliy merosga oid maʼlumotlar bilan yaqindan tanishdilar.

Aytish joizki, taʼlim muassasasida tashkil etilgan “Sudya va yoshlar” uchrashuvi ertangi faoliyatini huquqni muhofaza qiluvchi idoralar, davlat tashkilotlari bilan bog‘lash niyatidagi ko‘plab yigit-qizlarga o‘ziga xos motivatsiya bo‘ldi.

Namangan viloyati IIB Axborot xizmati