Assalomu  alaykum,  hurmatli Davlatobod tumanida yashab kelayotgan va tumanimizga tashrif buyurayotgan fuqarolar!

Tuman prokuraturasi va tuman IIB tomonidan 2025-yilning 1 — choragida qonun ustuvorligini taʼminlash, qonuniylik va huquq — tartibotni mustahkamlash borasida  tizimli  ishlar  amalga oshirildi.

Qonunlar ijrosi yuzasidan oʻtkazilgan 40 ga yaqin tekshirishlarda aniqlangan 500 dan ortiq qonun buzilishi holatlarini qariyb 200 ga yaqin prokuror nazorati hujjatlari  qoʻllash  orqali  bartaraf  etish  choralari  koʻrildi.

Xabaringiz bor, Prezidentimiz yaratib bergan mutlaqo yangicha tizim, yaʼni 2025-yil 3-yanvardagi “2025-yilda Respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora -tadbirlar toʻgʻrisida”gi PQ-1-son hamda 2025-yil 18-martdagi PQ­-111-sonli Qarorlari bilan kriminogen vaziyatni kundalik tahlil qilib, jinoyatlarning omillarini bartaraf etib kelayapmiz.

Taʼkidlash joizki, joriy yildan bu boradagi prokuror   nazorati   keskin   kuchaytirildi.

Ushbu qarorning ijrosini taʼminlash maqsadida prokuratura, hokimiyat, ichki ishlar organlari va sohaga maʼsul boʻlgan boshqa hamkor tashkilotlar bilan bir qator ishlar amalga oshirilmoqda.

Qarorga muvofiq har bir mahallada huquqbuzarlikning erta oldini olish, kriminogen vaziyatni barqarorlashtirish boʻyicha yangi mexanizm joriy etilib, Qarorning ijrosi boʻyicha tumandagi Toʻquvchi huquq tartibot maskanida  meni bevosita rahbarligimdagi shtab faoliyati yoʻlga   qoʻyildi.

Qaror ijrosi doirasida tumandagi jami 28 ta mahallaning kriminogen vaziyati ogʻir 8 tasiga masʼul rahbarlar nomma – nom   biriktirildi.

Shuningdek, tumandagi barcha mahallalarning 34-banddan iborat choraklik manzilli chora — tadbirlar “yoʻl   xaritalari”   ishlab   chiqildi va ijroga qaratildi.

Natijada, 28 ta mahallarning 11 (39,3%) tasida jinoyat sodir etilmadi, 14 (50,0%) tasida esa kamayishiga erishildi.

Joriy yilning 3 oyida 149 ta jinoyatlar sodir etilib, oʻtgan yilning shu davriga nisbatan 54 taga koʻpaydi.

Achinarlisi, ogʻir tan jaroxati yetkazish 1 (0/1) taga, firibgarlik 7 (1/8) taga, oʻlim bilan bogʻliq YTH 2 (0/2) taga ortib ketgan.

Ortgan jinoyatlarning salmogʻi kibber usulda oʻgʻirlik va firibgarlik  40 (8) ta hisobiga toʻgʻri keladi.

2025-yilning 3 oyida mahalla hududida 73 ta jinoyat sodir etilib, jinoyatlarning 53 tasi oldini olish mumkin boʻlgan jinoyatlarni tashkil qilgan va 3 ta (“Halqlar doʻstligi”, “Yangi tong” va “Umid”) mahalla kriminogen vaziyat boʻyicha “qizil” toifaga kiritilgan.

Qaror bilan 18-mart kunidan mahallalarda oldini olish mumkin boʻlgan ogʻir va oʻta ogʻir hamda oilaviy zoʻravonlik bilan bogʻliq jinoyatlarni kelib chiqish sababli individual – tanqidiy muhokama qilinib, qatʼiy nazorat va  soʻrov  tizimini   yoʻlga  qoʻyildi va sohada xato va kamchiliklarga yoʻl qoʻygan xodimlarga nisbatan qatʼiy prokuror nazorat hujjatlari qoʻllanilmoqda.

Mahallalarda sodir etilgan 28 ta oldini olish mumkin boʻlgan jinoyatlar sabablari tahlil qilinib, barchasi boʻyicha xizmat tekshiruv oʻtkazish boʻyicha taqdimnoma, 13 ta holatda intizomiy (11 ta profilaktika inspektori, 1 hokim yordamchisi, 1 ta xotin-qizlar faoli) javobgarlikka tortish toʻgʻrisida qaror qabul qilindi, 12 ta holatda kelgusida shu kabi holatlarga yoʻl qoʻymaslik boʻyicha ogohlantiruv choralari qoʻllanildi.

Hurmatli fuqarolar!

Tumanda oilaviy maishiy zoʻravonlikka uchragan 115 nafar xotin qizlarga himoya orderi berilgan.

Ularning 88 tasi er – xotiniga, 24 tasi qaynona – keliniga, 3 tasi voyaga yetmaganlarga nisbatan sodir etilgan.

Bu toifadagi jinoyatlar asosan rashk, ruhiy kasallik, aliment toʻlashdan boʻyin tovlash va boshqa oʻzaro nizo oqibatida kelib chiqmoqda.

Voyaga yetmaganlar jinoyatiga favqulodda holat sifatida qaralib, ularga taʼlim va tarbiyani berishda majburiyatlarini bajarmagan ota —  ona hamda yashash va oʻqish joylaridagi (mahalla yettiligi) mutasaddilarining javobgarligi kuchaytirildi.

Eʼtiboringizni qaratishingiz lozim boʻlgan yana bir dolzarb masala ­— keng muhokamaga sabab boʻlayotgan voyaga yetmaganlar ishtirokidagi yoʻl — transport hodisalari kundan  kun koʻpaymoqda.

Bu yoʻnalish bilan bogʻliq jinoyatlarni biz kengroq tahlil  qildik.

Raqamlarga qarasak, oxirgi bir yilda tumanda qariyb 10 ta holatda (2024-y. 7 ta, 2025-y. 3 ta) voyaga yetmaganlar tomonidan transport vositalarini olib qochib, yoʻl -transport hodisalari sodir etilgan.

Jinoyatlarning 2 tasi ijara asosida boshqarib  yurgan  voyaga  yetmaganlar  hissasiga toʻgʻri  kelmoqda.

Umuman olganda yoʻl — transport hodisalari oqibatida oʻtgan 2024-yilning oʻzida voyaga yetmaganlarning 1 nafari vafot etgan, 2 nafari esa ogʻir tan  jarohati  olgan.

Joriy yilning 1-choragida esa, 1 nafar voyaga yetmaganlar vafot etgan, 2 nafari ogʻir tan jarohati olishgan.  

Oʻrganishlar davomida, yoʻl-tarnsport hodisalari sodir etgan maktab oʻquvchilari bilan maktab maʼmuriyati va yoshlar yetakchisi tomonidan tarbiyaviy va profilaktik tadbirlar lozim darajada olib borilmaganligini koʻrsatmoqda.

Hurmatli fuqarolar!

Hurmatli Fuqarolar endi bugungi kundagi eng dolzarb masalalardan biri sodir etilgan korrupsiyaviy jinoyatlar va ularni oldini olish, bartaraf etish toʻgʻrisidagi ishlarga toʻxtalsam.

Tumanda 2025-yilning 3 oyida 10 nafar shaxslar tomonidan 8 ta korrupsiyaga oid jinoyatlari sodir etilgan.

Mazkur jinoyatlarni sodir etgan 10 nafar shaxslarning 2 nafari bank tizimi, 2 nafari ijro hokimyati, 1 nafari soliq, 2 nafari davlat ulushi boʻlmagan xoʻjalik yurituvchi subyekt xodimlarini hamda 3 nafari fuqarolarni tashkil etadi.

Tumanda korrupsion jinoyatlarni kelib chiqish sabablarini tahlil qilish maqsadida ushbu turdagi jinoyatlar koʻp sodir etilayotgan tashkilotlarda (tuman elektr tarmoqlari, gaz idoralari hamda tuman tibbiyot birlashmasida) anonim soʻrovnomalar oʻtkazildi.

Tumanda jinoyatlarga chek qoʻyish va keng jamoatchilikni jinoyatlarni oldini olishga hamda ularni bartaraf etish boʻyicha faol hamkorlikka chaqirib, hududlarda targʻibot tadbirlarini oʻtkazib, har bir holatni tuman va viloyat miqyosidagi ijtimoiy tarmoqlarda yoritib kelmoqdamiz.

Hurmatli   fuqarolar!

Biz, tumandagi kriminogen vaziyatni yaxshilab, «obod va xavfsiz yurtni» barpo etishda Sizlar bilan faol muloqotga hamisha tayyormiz, bildirilgan fikrlarni atroflicha koʻrib chiqib, kamchiliklarni bartaraf  etishdan manfaatdormiz.

Davlatobod tumani IIB boshligʻining tuman aholisiga murojaati